Onyankopɔn, obiara temmufo

¹Awurade, woyɛ Onyankopɔn a wotwe aso, da w’abufuw adi! ² Woyɛ nnipa nyinaa temmufo. Sɔre na fa nea ɛfata ahantanfo ma wɔn! ³ Amumɔyɛfo ani begye akosi da bɛn? Da bɛn Awurade? ⁴ Awudifo bɛyɛ ahantan ahoahoa wɔn ho wɔ wɔn awudi mu akosi da bɛn? ⁵ Wobubu wo nkurɔfo, Awurade, wɔka wo nkurɔfo hyɛ. ⁶ Wokunkum akunafo ne nyisaa ne amanfrafo a wɔte yɛn asase so. ⁷ Wɔka se, “Awurade nhu yɛn; Israel Nyankopɔn nhu.”

⁸ Me nkurɔfo, adɛn nti na ɛsɛ sɛ moyɛ agyimifo saa? Da bɛn na mubesua nyansa? ⁹ Onyankopɔn a ɔbɔɔ yɛn aso; ɔnte asɛm? Ɔbɔɔ yɛn ani; onhu ade? ¹⁰ Ɔno na aman hyɛ n’ase; ɔrentwe wɔn aso? Ɔno ne nnipa nyinaa kyerɛkyerɛfo; onni osuahu bi?

¹¹ Awurade nim wɔn nsusuwii. Onim nyansa a enni wɔn nsusuwii mu no. ¹² Awurade, ahotɔ bɛn na onipa a wokyerɛ no no nnya; onipa a wokyerɛ no wo mmara no. ¹³ Woma ɔhome fi nna a ɔhaw wɔ mu mu kosi sɛ wotu amoa ma omumɔyɛfo tɔ mu. ¹⁴ Awurade rennyaw ne nkurɔfo; ɔrentew ne ho mfi wɔn a wɔyɛ ne de ho. ¹⁵ Wobebu atɛntrenee wɔ asennii bio, na atreneefo apene so.

¹⁶ Hena na osii m’ananmu, ko tiaa amumɔyɛfo? Hena na osii m’ananmu ko tiaa nnebɔneyɛfo? ¹⁷ Sɛ Awurade ammoa me a anka mekɔɔ kommyɛbea. ¹⁸ Mekae se, “Meretew ahwe;” nanso, O Awurade, wo dɔ a ɛnsa da no soo me mu.

¹⁹ Bere biara a me ho ntɔ me no, wokyekye me werɛ ma m’ani gye. ²⁰ Wo ne atemmufo a wobu atɛnkyew ma atɛnkyew yɛ atɛntrenee ²¹ na wɔpam tia nnipa pa na wobu wɔn kumfo no nni biribiara yɛ. ²² Nanso Awurade bɔ me ho ban; me Nyankopɔn bɔ me ho ban. ²³ Ɔbɛtwe wɔn aso wɔ wɔn amumɔyɛ no ho na wɔn bɔne nti, wasɛe wɔn; Awurade, yɛn Nyankopɔn bɛsɛe wɔn.