Onyankopɔn, yɛn hwɛfo

¹Obiara a wobɛkɔ Awurade nkyɛn sɛ wo guankɔbea, obiara a ɔbɛhyɛ Otumfoɔ no banbɔ ase no ² tumi ka kyerɛ no se, “Woyɛ me hwɛfo ne me guankɔbea. Woyɛ me Nyankopɔn na mewɔ wo mu ahotoso.” ³ Ɔbɛkora wo afi bɔne a ahintaw nyinaa ne ɔyarewu nyinaa ho. ⁴ Ɔde ne ntaban bɛkɛta wo so; ne hwɛ mu, hwee renyɛ wo. Ne nokware bɛbɔ wo ho ban. ⁵ Ɛnsɛ sɛ wusuro anadwo mu amanehunu anaa awia mu ɔtaa ⁶ anaa ɔyaredɔm a ɛba anadwo anaa amumɔyɛde a ɛsɛe ade awia ketee.

⁷ Apem totɔ wo nkyɛn na ɔpedu totɔ wo nifa a, wo de, ɛrenka wo. ⁸ W’ani nko na wode bɛhwɛ na wahu nnebɔneyɛfo asotwe. ⁹ Woayɛ Awurade wo hwɛfo, ɔsorosoroni no wo guankɔbea ¹⁰ enti asiane biara mma wo so, na basabasayɛ biara remmɛn w’atenae. ¹¹ Onyankopɔn bɛma n’abɔfo abɛwɛn wo na baabiara a wobɛkɔ no, wɔabɔ wo ho ban. ¹² Wobesuso wo mu wɔ soro sɛnea wo nan renhintiw, mpira. ¹³ Wubetiatia agyata ne awɔ, agyata a wɔn ho yɛ hu ne awɔ a wɔn ano bɔre yɛ den so.

¹⁴ Onyankopɔn se, “Megye wɔn a wɔdɔ me no nkwa, na mabɔ wɔn a wonim me sɛ Awurade no ho ban. ¹⁵ Sɛ wɔfrɛ me a, megye wɔn so; sɛ ɔhaw to wɔn a, mɛka wɔn ho. Megye wɔn na mahyɛ wɔn anuonyam. ¹⁶ Mɛma wɔn nkwa nna aware. Megye wɔn nkwa.”