Ayeyi ne aseda dwom

¹Nnipa nyinaa, momfa ahosɛpɛw nto ayeyi dwom mma Onyankopɔn! ² Monto, nkamfo ne din. Monkamfo n’anuonyam!

³ Munse Onyankopɔn se, “Wo nsa ano nnwuma yɛ nwonwa. Wo tumi so kosi sɛ w’atamfo de suro kotow w’anim. ⁴ Obiara a ɔwɔ asase so kotow wo. Wɔto dwom de kamfo wo; wɔto dwom de kamfo wo din. ⁵ Mommra mmɛhwɛ nea Onyankopɔn ayɛ; anwonwade a wayɛ wɔ nnipa mu. ⁶ Ɔmaa ɛpo yɛɛ asase kesee; yɛn nenanom de wɔn nan twaa asu no. Ɛhɔ na nea ɔyɛe no nti, yɛn ani gyei.

⁷ Ne tumi nti, odi hene daa daa, na ɔde n’ani nso hwɛ aman so. Mma dɔm nnsɔre nntia no.

⁸ Aman nyinaa, monkamfo yɛn Nyankopɔn; momma wɔnte mo nkamfo no. ⁹ Wama yɛte nkwa mu na ɔmma ho kwan mma yɛnhwe ase. ¹⁰ Onyankopɔn, woasɔ yɛn ahwɛ. Sɛnea ogya hoa dwetɛ ho no, saa ara na woasɔ yɛn ahwɛ. ¹¹ Womaa firi yii yɛn na wode nnosoa a ɛyɛ duru guu yɛn akyi. ¹² Womaa yɛn atamfo twiw faa yɛn so. Yɛfaa ogya ne nsuyiri mu, nanso mprempren wode yɛn abedu baabi a asomdwoe wɔ.

¹³ Mede ɔhyew afɔre bɛba wo fi; mede nea mehyɛɛ wo ho bɔ no bɛma wo. ¹⁴ Mede nea mekae se mede bɛma wo bere a na mewɔ ɔhaw mu no, bɛma wo. ¹⁵ Mɛma oguan, na wɔahyew no afɔremuka no so. Mede anantwinini ne mmirekyi bɛbɔ afɔre no, na wusiw no akɔ soro tee.

¹⁶ Mo a mohyɛ Onyankopɔn anuonyam nyinaa mommra mmetie, na mɛka nea wayɛ ama me akyerɛ mo. ¹⁷ Misu frɛɛ no sɛ ɔmmoa me; metoo nnwom kamfoo no. ¹⁸ Sɛ midii me bɔne akyi a, anka Awurade rentie me. ¹⁹ Nanso, nokwarem, Onyankopɔn atie me, watie me mpaebɔ.

²⁰ Mekamfo Onyankopɔn efisɛ, wampo me mpaebɔ na wannyae ne dɔ a ɔde dɔ me daa no.