Ɔhaw mu anwiinwii

¹Mekamfo wo, Onyankopɔn; nyɛ komm! ² Amumɔyɛfo ne atorofo aba me so. Wɔka atorosɛm fa me ho, ³ na wɔka bɔne fa me ho, taa me so kwa. ⁴ Ɛwom sɛ medɔ wɔn, bɔ mpae ma wɔn, nanso wotia me. ⁵ Papa a meyɛ no, wɔde bɔne tua me so ka, na ɔdɔ a medɔ wɔn no, wɔde ɔtan tua me so ka.

⁶ Hwehwɛ ɔtemmufo bɔne na onni me tamfo asɛm, na ma ɔno ara n’atamfo no mu baako nkasa ntia no. ⁷ Ma wonni n’asɛm na wommu no fɔ; ne mpaebɔ mpo, ma wɔmfa no sɛ ɛyɛ awudi! ⁸ Ma ne nkwa nna to ntwa; ma ɔfoforo nyɛ n’adwuma! ⁹ Ma ne mma nyɛ nnyanka na ne yere nyɛ okunafo. ¹⁰ Ma ne mma nyɛ adesrɛfo a wonni baabi te; ma wɔmpam wɔn mfi amamfo a wɔte hɔ no. ¹¹ Ma n’adefirifo mmɛsesaw n’agyapade nyinaa, na ma amamfrafo nya dwuma biara a odii ho mfaso. ¹² Mma obiara nnhu no mmɔbɔ. Mma obiara nnhu nnyanka a ogyaw wɔn akyiri no nso mmɔbɔ. ¹³ Ma n’asefo nyinaa nwuwu na ma wɔn werɛ mfi ne din wɔ nkyirimma a wɔreba no mu. ¹⁴ Awurade, nkae n’asefo na wɔmmfa ne na bɔne mmfiri no da biara da. ¹⁵ Awurade nkae wɔn bɔne daa na wɔn de, ɛnsɛ sɛ obiara kae wɔn da biara da.

¹⁶ Saa onipa no annwene atirimɔmmerɛw ho; ɔtaa ahiafo, mmɔborɔfo ne wɔn a wonni aboafo kum wɔn. ¹⁷ Ɔpɛɛ nnome, enti wɔnnome no! Na onhyira, enti obi nso renhyira no! ¹⁸ Na ɔdome te sɛ nea ɔrehyɛ atade, enti ɔno ara ne nnome no nnonom nkɔ ne nipadua mu sɛ nsu, ne ne nnompe mu sɛ ngo!

¹⁹ Ma wɔnkata ne ho sɛ ntade na entwa ne ho nhyia sɛ abɔso! ²⁰ Awurade, twe m’atamfo aso saa kwan no so, wɔn a wɔka nsɛmmɔne tia me no.

²¹ Nanso, wo Awurade me Nyankopɔn, boa me sɛnea woahyɛ me bɔ no na esiane wo dɔ mu ade pa nti, gye me.

²² Ahia me na minni biribiara. Me koma mu hyehye me. ²³ Mete sɛ anwummere sunsuma a ɛreyɛ ayera; mframa bɔ me sɛ aboawa. ²⁴ Aduan a minnya nti, me kotodwe mu agugow; menyɛ hwee sɛ ɔhonam ne nnompe kɛkɛ. ²⁵ Sɛ nnipa hu me a, wɔserew me; wɔwosow wɔn ti di me ho fɛw.

²⁶ Boa me, O Awurade me Nyankopɔn; wo dɔ a ɛnsa da no nti, gye me! ²⁷ Ma m’atamfo nhu sɛ wo ne me gyefo. ²⁸ Wɔbɛdome me, nanso wubehyira me. Ma wɔn a wɔtaa me no nni nkogu, na ma me a meyɛ wo somfo no ani nnye.

²⁹ Ma animguase nnura m’atamfo ho; ma wɔnhyɛ animguase no sɛ atade. ³⁰ Mɛda Awurade ase. Mɛkamfo no wɔ ne baguafo anim ³¹ efisɛ, ɔbɔ ohiani ho ban na ogye no fi wɔn a wɔabu no kumfɔ nsam.