De kamfo Onyankopɔn papayɛ

¹Mɛda Awurade ase daa! Merennyae no kamfo da. ² Mɛkamfo no wɔ nea wayɛ ama me no ho. Wɔn a wɔhyɛ wɔn so nyinaa ntie na wɔn ani nnye! ³ Mo ne me nkamfo Awurade kɛseyɛ; momma yɛmmom nkamfo ne din!

⁴ Mefrɛɛ Awurade na ogyee me so; oyii me fii me suro mu. ⁵ Wɔn a wɔhyɛ wɔn so hwɛ no na wɔn ani gye; wɔrenni wɔn huammɔ. ⁶ Onnibie frɛ no na ogye wɔn so; ogye wɔn fi wɔn haw nyinaa mu. ⁷ Wɔn a wotie Awurade no, ne bɔfo wɛn wɔn, na ogye wɔn fi amane mu.

⁸ W’ankasa hwɛ ye a Awurade ye. Nhyira nka wɔn a wonya guankɔbea wɔ ne mu. ⁹ Awurade nkurɔfo nyinaa muntie no. Wɔn a wotie no no, nya nea ehia wɔn nyinaa. ¹⁰ Agyata mpo, sɛ wonnya aduan a, ɔkɔm de wɔn; nanso wɔn a wotie Awurade no hwee nhia wɔn.

¹¹ Me nnamfonom nkumaa, mummetie me, na menkyerɛ mo sɛnea mobɛhyɛ Awurade anuonyam. ¹² Mopɛ sɛ motena anigye mu? Mopɛ nkwa tenten ne ahotɔ? ¹³ Ɛnne munnyae bɔne kasa ne atoro twa. ¹⁴ Munnyae bɔne yɛ na monyɛ papa; momfa mo koma nyinaa ntiw asomdwoe akyi.

¹⁵ Awurade hwɛ atreneefo na otie wɔn sufrɛ nso. ¹⁶ Nanso nnebɔneyɛfo de, otia wɔn; nti sɛ wowu a, ɛnkyɛ, wɔnkae wɔn. ¹⁷ Atreneefo frɛ Awurade na otie; ogye wɔn fi wɔn haw nyinaa mu.

¹⁸ Awurade bɛn wɔn a wɔapa abaw. Ogye wɔn a wɔn anidaso asa nkwa. ¹⁹ Ɔhaw bebree to onipa pa; nanso, Awurade gye no fi ne nyinaa mu. ²⁰ Awurade kora ne so koraa a ne dompe baako mpo remmu.

²¹ Bɔne kum ɔdebɔneyɛfo. Wɔbɛtwe wɔn a wɔtan trenee aso. ²² Awurade begye ne nkurɔfo nkwa. Wɔn a woguan toa no no wɔn ho renka.