Ogye ho mpaebɔ

¹Yɛate wɔ yɛn ankasa yɛn asom, O Onyankopɔn. Yɛn nenanom aka ho asɛm akyerɛ yɛn; nneɛma akɛse a woyɛe wɔn bere so no nyinaa, wɔaka akyerɛ yɛn; saa tete mmere no: ² sɛnea wopamoo abosonsomfo na wobɔɔ wo nkurɔfo atenase wɔ wɔn asase so no, sɛnea wotwee aman foforo aso, na womaa wo de nyaa nkɔso no. ³ Wo nkurɔfo amfa wɔn nkrante na edii asase no so. Ɛnyɛ wɔn tumi so na wɔnam dii so. Wo tumi ne w’ahoɔden, ɔka a wokae se wobɛba hɔ no na ɛdaa ɔdɔ a wodɔ wɔn no adi.

⁴ Woyɛ me hene ne me Nyankopɔn; wokyɛ wo nkurɔfo nkonimdi, ⁵ na yɛnam wo tumi so di yɛn atamfo so. ⁶ Memfa me ho nto m’agyan anaa me nkrante so sɛ ennye me nkwa. ⁷ Nanso woagye yɛn afi yɛn atamfo nsam adi wɔn a wɔtan yɛn so.

⁸ Yɛbɛkamfo wo daa na yɛada wo ase daa daa. ⁹ Nanso afei woatwe wo ho sɛ wonni yɛn so. Afei wo ne yɛn asraafodɔm no nkɔ bio. ¹⁰ Woama yɛaguan yɛn atamfo ama wɔafa yɛn agyapade. ¹¹ Woama kwan ama wɔakum yɛn sɛ nguan. Wopetee yɛn amanfrafo nkurow so. ¹² Wotɔn wo ara wo nkurɔfo aboɔmmerɛw sɛnea wɔn ho nni mfaso biara. ¹³ Yɛn afipamfo huu nea woyɛɛ yɛn, na wodii yɛn ho fɛw, serewee. ¹⁴ Woama yɛn anim agu ase wɔ aman anim. Wɔwosow wɔn ti de serew yɛn. ¹⁵ Daa na m’anim agu ase. Ahohora adura me ¹⁶ fi m’atamfo ne wɔn a wokyi me kasatia mu.

¹⁷ Eyinom nyinaa aba yɛn so, nanso yɛn werɛ mfi wo, na yemmuu apam a wo ne yɛn hyehyɛe no nso so. ¹⁸ Yennii wo huammɔ. Yemmuu wo mmara so. ¹⁹ Nanso wugyaa yɛn wɔ nkekaboa mu a mmoa biara mfi baabi. Wugyaa yɛn sum kabii mu. ²⁰ Sɛ yegyaee yɛn Nyankopɔn som kɔsom anyame foforo bi a, ²¹ anka nea ɛbɛyɛ biara wubehu. Efisɛ, wunim yɛn nsusuwii. ²² Nanso wo nti na daa nyinaa wokum yɛn sɛ nguan no.

²³ Keka wo ho, Awurade! Adɛn nti na woada? Sɔre! Nnyaw yɛn afebɔɔ saa! ²⁴ Adɛn nti na wode wo ho ahintaw yɛn? Mma wo werɛ mmfi yɛn amanehunu ne yɛn haw! ²⁵ Wɔapɛkyɛw yɛn wɔ fam. Yegu mfutuma mu a wodi yɛn so. ²⁶ Bɛboa yɛn! Esiane ɔdɔ a wodɔ yɛn daa nti, gye yɛn nkwa.