Akwankyerɛ ne ogye mpaebɔ

¹O, wo Awurade na mebɔ wo mpae; ² wo mu, me Nyankopɔn, na mahotoso wɔ. Gye me fi nkogu animguase mu. Mma m’atamfo ani mmmere me. ³ Wɔn a wɔde wɔn ho to wo so no nni nkogu, na mmom wɔn a wɔsɔre tia wo no.

⁴ Kyerɛ me w’akwan, O Awurade; da no adi kyerɛ me. ⁵ Kyerɛ me na mentena ase wo nokware mu; efisɛ, wo ne me Nyankopɔn a wugye me nkwa. Daa mede me ho to wo so. ⁶ Kae, O Awurade, w’adɔe ne wo dɔ a efi tete woada no adi akyerɛ me no. ⁷ Fa me mmabun mu bɔne ne mfomso kyɛ me. Kae me wo dɔ a wode dɔ me daa no, Awurade!

⁸ Esiane sɛ Awurade yɛ ɔtreneeni na oye nti, ɔkyerɛ nnebɔneyɛfo kwan a wɔmfa so. ⁹ Ɔkyerɛ ahobrɛasefo ɔkwan pa ne n’apɛde. ¹⁰ Ɔde nokware ne ɔdɔ di wɔn a wodi n’apam ne ne mmara so no anim.

¹¹ Di wo bɔhyɛ so, Awurade, na fa me bɔne kyɛ me, efisɛ, ɛdɔɔso.

¹² Wɔn a wotie Awurade no behu ɔkwan a ɛsɛ sɛ wɔfa so.

¹³ Wobenya nkɔso daa, na wɔn mma afa asase no.

¹⁴ Awurade fa wɔn a wotie no no nnamfo, na ɔne wɔn hyɛ n’apam no mu den. ¹⁵ Mede me ho to Awurade so sɛ ɔmmoa me daa nyinaa; ogye me fi amane mu. ¹⁶ Dan w’ani hwɛ me, O Awurade, na hu me mmɔbɔ efisɛ, meyɛ ɔbaakofo a mayɛ mmerɛw. ¹⁷ Yi me dadwene ne me haw nyinaa fi me so. ¹⁸ Dwen me mmɔborɔyɛ ne m’amanehunu ho na fa me bɔne nyinaa kyɛ me. ¹⁹ Hwɛ atamfo dodow a mewɔ; hwɛ ɔtan a wɔtan me. ²⁰ Bɔ me ho ban na gye me nkwa. Yi me fi nkogu mu. Merebɛpɛ guankɔbea wɔ wo nkyɛn.

²¹ Me trenee ne me nokware nhwɛ me so efisɛ, mewɔ wo mu ahotoso. ²² O, Onyankopɔn, gye wo man Israel fi wɔn haw mu.