Onyankopɔn ho anigyina

¹O Onyankopɔn, woyɛ me Nyankopɔn na m’ani agyina wo. Me nipadua nyinaa hwehwɛ wo te sɛ asase a ɛso awo na srade ne nsu nni mu. Wo ho sukɔn de me kra. ² Ma minhu wo wɔ Kronkron mu Kronkron hɔ; ma minhu sɛ woyɛ ɔkɛse ne onuonyamfo. ³ Wo dɔ a wodɔ daa no ye sen nkwa ankasa mpo, enti mɛkamfo wo. ⁴ Sɛ mete ase yi, mɛda wo ase. Mɛma me nsa so abɔ wo mpae. ⁵ Me kra bedidi na amee na mɛto anigye nnwom ayi wo ayɛ.

⁶ Meda mpa so nyinaa, mekae wo. Anadwo nyinaa, midwen wo ho ⁷ efisɛ, daa woyɛ me boafo. Wo ntaban ase nwini mu na mɛto anigye dwom. ⁸ Me bata wo ho na wo nsa hwɛ me so yiye. ⁹ Wɔn a wɔpɛ sɛ wokum me no bɛkɔ asaman ase pɛɛ. ¹⁰ Wobekum wɔn wɔ ɔko mu na mpataku awe wɔn nam. ¹¹ Esiane sɛ Onyankopɔn ma no nkonim nti, ɔhene no benya ahosɛpɛw. Wɔn a wɔhyɛ bɔ wɔ Onyankopɔn din mu no bɛkamfo no, nanso atorofo ano de, wɔbɛto mu.