Onyankopɔn ne ne nkurɔfo

¹Monna Awurade ase; monna ne kɛseyɛ adi. Ka nea wayɛ kyerɛ aman. ² Monto ayeyi nnwom mma Awurade! Monka anwonwade a wayɛ no nkyerɛ. ³ Momma mo ani nnye sɛ yɛyɛ ne de. Momma wɔn a wɔsom no no nyinaa ho nsɛpɛw wɔn. ⁴ Monkɔ Awurade nkyɛn na ɔmmoa mo na monkɔ so nsom na daa.

⁵ Mo Abraham asefo, n’asomfo; mo Yakob asefo, ɔbarima a oyii no, ⁶ monkae anwonwade a Onyankopɔn yɛe ne atɛn a obui. ⁷ Awurade yɛ yɛn Nyankopɔn. Ne mmara wɔ hɔ ma wiase nyinaa. ⁸ Obedi n’apam so daa daa ne ne bɔhyɛ so kosi nkyirimma mpempem so. ⁹ Obedi apam a ɔne Abraham pamee no ne bɔ a ɔhyɛɛ Isak no so. ¹⁰ Awurade ne Yakob yɛɛ apam a ɛbɛtena hɔ daa daa. ¹¹ Ɔkae se, “Mede Kanaan asase no bɛma wo na ɛbɛyɛ wo de.” ¹² Na Onyankopɔn nkurɔfo a wɔwɔ Kanaan no sua, na na wɔyɛ amamfrafo nso. ¹³ Wofi aman so kɔɔ aman so; fi ahemman mu kɔɔ ahemman mu. ¹⁴ Nanso Onyankopɔn amma obi anhyɛ wɔn so; ɔbɔɔ ahene no kɔkɔ sɛ wɔmmɔ wɔn ho ban. Ɔkae se, ¹⁵ “Monnhaw m’asomfo a mayi wɔn; mommfa mo nsa nnka m’adiyifo.”

¹⁶ Awurade maa ɔkɔm kɛse bae wɔn man mu hɔ, na ɔfaa wɔn nnuan nyinaa. ¹⁷ Nanso ɔsomaa ɔbarima bi dii wɔn anim; Yosef a wɔtɔn no sɛ akoa no. ¹⁸ Woguu ne nan nkɔnsɔnkɔnsɔn, na wɔde ne kɔn hyɛɛ dabedan mu, ¹⁹ kosii sɛ nea ɔhyɛɛ ho nkɔm no baa mu. Awurade asɛm daa n’asɛm no mu nokware adi. ²⁰ Afei Misraimhene ma wogyaa no; aman so hene gyaa no. ²¹ Ɔde no fraa n’amammufo mu yɛɛ no asase no nyinaa so panyin, ²² a na odi ɔhene no mpanyimfo nyinaa so, na ɔwɔ tumi sɛ ɔkyerɛ n’afotufo no nea wɔnyɛ.

²³ Afei, Yakob kɔɔ Misraim kɔtenaa ɔman no mu. ²⁴ Awurade maa ne nkurɔfo woo mma bebree na ɔyɛɛ wɔn den sen wɔn atamfo. ²⁵ Ɔmaa Misraimfo no tanee ne nkurɔfo ani na wosisii n’asomfo no.

²⁶ Afei ɔsomaa ne somfo Mose ne Aaron a wayi wɔn no. ²⁷ Wɔyɛɛ Onyankopɔn tumidwuma yɛɛ anwonwade wɔ Misraim. ²⁸ Onyankopɔn maa sum durui ɔman no mu, nanso Misraimfo no antie ne mmara no. ²⁹ Ɔmaa wɔn nsu nyinaa danee mogya, kum mu mpataa nyinaa. ³⁰ Mpɔtorɔ bu faa ɔman no so kosii sɛ ahemfi hɔ nyinaa danee mpɔtorɔ. ³¹ Onyankopɔn hyɛe maa nwansena ne ntontom baa ɔman no mu bɔrebɔre. ³² Ɔmaa asukɔtwea ne anyinam danee nsu tɔe wɔ asase no so, ³³ sɛee wɔn bobe ne wɔn borɔdɔma bubuu nnua nyinaa gui. ³⁴ Ɔhyɛe maa mmoadabi bae wɔn dodow mu ³⁵ bɛsɛee asase no so mfumduan nyinaa.

³⁶ Okum Misraimfo mmarima a wɔyɛ mmakan nyinaa. ³⁷ Afei odii Israelfo no anim de wɔn puei. Wɔsoaa dwetɛ ne sikakɔkɔɔ a na wɔn nyinaa wɔ apɔwmuden ne ahoɔden. ³⁸ Na Misraimfo no suro wɔn nti, wotu fii hɔ no, wɔn ani gyei.

³⁹ Onyankopɔn maa omununkum kataa ne nkurɔfo so, na ogya maa wɔn hann de kyerɛɛ wɔn kwan anadwo. ⁴⁰ Wobisae na ɔmaa wɔn mmoko. Ɔmaa aduan fi soro bae na wodi mee. ⁴¹ Obuee ɔbotan mu maa nsu fii mu bae ma ɛfaa sare no so nyinaa sɛ asubɔnten. ⁴² Ɔkaee bɔ kronkron bi a ɔhyɛɛ Abraham no.

⁴³ Enti odii ne nkurɔfo no anim de wɔn puei, na wɔtoo nnwom teɛteɛɛm ahosɛpɛw so. ⁴⁴ Ɔde nnipa foforo bi nsase maa wɔn ma wɔfaa wɔn mfuw no. ⁴⁵ Sɛnea ɛbɛyɛ a ne nkurɔfo bedi ne mmara ne n’ahyɛde nyinaa so.