Bɔne fafiri mpaebɔ

¹Hu me mmɔbɔ, O Onyankopɔn, wɔ dɔ a wodɔ me daa nti. Esiane w’ahummɔbɔ kɛse nti, popa me bɔne! ² Hohoro m’amumɔyɛ nyinaa na tew me ho fi me bɔne mu! ³ Mihu me mfomso; daa mekae me bɔne. ⁴ Mayɛ bɔne atia wo; atia wo nko. Na mayɛ nea woka se ɛyɛ amumɔyɛ. Enti sɛ wubu me atɛn a, na ɛfata. Na wudi bem nso sɛ wubu me fɔ. ⁵ Meyɛ bɔne fi m’awosu mu; efi da a wɔwoo me no, na meyɛ bɔne. ⁶ Nokware na wohwehwɛ. Fa wo nyansa hyɛ m’adwene mu.

⁷ Yi me bɔne na me ho bɛtew. Hohoro me ho na mɛhoa asen sukyerɛmma. ⁸ Ma mente ahosɛpɛw ne anigye. Ɛwom, woabubu me pasaa de; nanso me ho bɛtɔ me bio. ⁹ Kata w’ani wɔ me bɔne ho na popa m’amumɔyɛ nyinaa. ¹⁰ Ma me koma mu ntew, O Onyankopɔn, na fa nokware honhom foforo hyɛ me mu. ¹¹ Mpam me mfi w’anim. Nyi wo honhom kronkron, mfi me mu. ¹² Ma me ahosɛpɛw a efi wo nkwagye mu no bio. Na ma ɛnyɛ me pɛ sɛ metie wo. ¹³ Na mɛkyerɛ nnebɔneyɛfo wo mmara na wɔbɛsan aba wo nkyɛn. ¹⁴ Fa me nkwa kyɛ me, O Onyankopɔn, na gye me nkwa na mede anigye bɛda wo trenee adi. ¹⁵ Boa me na menkasa, Awurade, na mɛkamfo wo.

¹⁶ Wompɛ afɔrebɔ anka mɛbɔ wo bi. Ɔhyew afɔre nsɔ w’ani. ¹⁷ M’afɔrebɔ yɛ ahobrɛase honhom, O Onyankopɔn. Worempo ahobrɛase ne koma a anu ne ho.

¹⁸ O Onyankopɔn, ma Sion nhu w’ayamye na boa no na ɔnto Yerusalem afasuw no.

¹⁹ Na afei w’ani bɛsɔ afɔrebɔ a edi mu ne ɔhyew afɔre ne anantwinini afɔre a wɔbɛbɔ wɔ w’afɔremuka so.