Ɔmanehunufo mpaebɔ

¹O Awurade, ntwe m’aso wɔ w’abufuw mu! ² Wode w’agyan apira me. Woabɔ me ahwe fam. ³ W’abufuw no nti mewɔ yaw a ano yɛ den mu. Me bɔne nti, ɔyare adidi me honam nyinaa. ⁴ Me bɔne reyiri fa me; ɛyɛ adesoa a emu yɛ me duru. ⁵ Esiane sɛ magyimi nti, m’akuru bɔn na ɛreporɔw. ⁶ Makotow ma wɔabubu me. Mitwa agyaadwo daa nyinaa. ⁷ Atiridii rekum me. Mereyɛ awu. ⁸ Mabrɛ a mapɛkyɛw koraa. Me koma redi yaw na yaw ama merepene.

⁹ O Awurade, wunim nea me kɔn dɔ. Wote m’apinisi nyinaa. ¹⁰ Me koma repere. M’ahoɔden asa na m’aniwa adum.

¹¹ Me nnamfo ne m’afipamfo remmɛn me; m’akuru nti, m’abusuafo mpo twe wɔn ho fi me ho.

¹² Wɔn a wɔpɛ sɛ wokum me no, sum me firi na wɔn a wɔpɛ sɛ wopira me no, hunahuna me; wonnyae sɛ wɔpɛ me bɔne da.

¹³ Mete sɛ ɔsotifo; mente asɛm. Mete sɛ mumu; mintumi nkasa. ¹⁴ Mete sɛ obi a ɔmma mmuae efisɛ, mente asɛm. ¹⁵ Nanso mede me ho to wo so, O Awurade; na wo, O Awurade me Nyankopɔn, wubebua me. ¹⁶ Mma m’atamfo ani nnye m’amanehunu ho. Mma wɔmmfa m’asehwe nhoahoa wɔn ho.

¹⁷ Mereyɛ ahwe ase enti mewɔ yaw mu daa. ¹⁸ Meka me bɔne. Ɛma me werɛ how. ¹⁹ M’atamfo wɔ apɔwmuden ne ahoɔden. Bebree wɔ hɔ a wɔtan me kwa. ²⁰ Wɔn a wɔde bɔne tua papa ka no tia me efisɛ, mebɔ mmɔden sɛ mɛyɛ papa.

²¹ Nnyaw me, O Awurade. Nkɔ akyiri, O me Nyankopɔn! ²² Boa me mprempren, Awurade, m’agyenkwa.