Nkonimdi ho mpaebɔ

¹Da Awurade ase efisɛ, oye na n’adɔe nso wɔ hɔ daa.

² Nnipa a wɔwɔ Israel nyinaa nka se, “N’adɔe wɔ hɔ daa.” ³ Onyankopɔn asɔfo nyinaa nka se, “N’adɔe wɔ hɔ daa.” ⁴ Wɔn a wɔsom no nyinaa nka se, “N’dɔe wɔ hɔ daa.”

⁵ M’amanehunu mu, mefrɛɛ Awurade; ogyee me so ma medee me ho. ⁶ Awurade ne me wɔ hɔ enti minsuro biribiara. Dɛn na obi betumi ayɛ me? ⁷ Awurade na ɔboa me na mɛhwɛ sɛ wobedi m’atamfo so.

⁸ Awurade mu ahotoso ye sen nnipa mu ahotoso. ⁹ Awurade mu ahotoso ye sen mpanyimfo mu ahotoso.

¹⁰ Atamfo pii twaa me ho hyiae, nanso Awurade tumi nti, mesɛee wɔn nyinaa. ¹¹ Baabiara na wɔatwa me ho ahyia nanso Awurade tumi nti, mesɛee wɔn nyinaa. ¹² Wɔbɛkyere guu me so sɛ nnowa nanso wɔhyewee ntɛm so sɛnea ogya atɔ nsɔe mu; Awurade tumi nti, mesɛee wɔn. ¹³ Wɔbaa me so ahoɔden so a na wɔredi me so nanso Awurade boaa me. ¹⁴ Awurade maa me tumi ne ahoɔden; wagye me nkwa. ¹⁵ Muntie sɛ Onyankopɔn nkurɔfo a wɔwɔ ne ntamadan mu reteɛm anigye ne nkonimdi so se, “Awurade ahoɔden tumi no na ayɛ. ¹⁶ Ne tumi abrɛ yɛn nkonim, n’ahoɔden tumi wɔ ɔko mu no!” ¹⁷ Merenwu; mmom mɛtena ase na mapae mu aka nea Awurade ayɛ. ¹⁸ Watwe m’aso dennen de, nanso wamma manwu.

¹⁹ Bue Fie hɔ pon ma me, na mɛkɔ mu akɔda Awurade ase. ²⁰ Awurade pon ni; atreneefo nko ara na wotumi ba mu. ²¹ Mekamfo wo, Awurade, efisɛ, wotee me nka, efisɛ, woama me nkonimdi.

²² Ɔbo a adansifo poe sɛ ɛho nni mfaso no, na ɛho baa mfaso koraa. ²³ Awurade na ɔyɛɛ eyi. Ɛyɛ nwonwa aniso! ²⁴ Ɛnnɛ yɛ Awurade nkonim da. Momma yɛn ani nnye. Momma yenni da no. ²⁵ Gye yɛn nkwa, Awurade, gye yɛn nkwa! Ma yenni nkonim, O Awurade! ²⁶ Awurade nhyira obiara a ɔba Awurade din mu. Yehyira mo fi Awurade fi.

²⁷ Awurade yɛ Onyankopɔn. Wayɛ yɛn adɔe. Nnubaa kitakita mo yi, mumfiti afahyɛ no ase na muntwa afɔremuka no ho nhyia. ²⁸ Woyɛ me Nyankopɔn na meda wo ase. Mɛpae mu maka wo kɛseyɛ. ²⁹ Da Awurade ase efisɛ, oye na n’adɔe wɔ hɔ daa.