Ayeyi mpaebɔ

¹Awurade ne me hann ne me nkwagye; merensuro obiara. Awurade bɔ me ho ban fi amane mu ɛno nti, merensuro da. ² Sɛ nnebɔneyɛfo toa me pɛ sɛ wokum me a, wohintiw, hwe ase. ³ Sɛ asraafodɔm mpo twa me ho hyia a, merensuro da; sɛ atamfo ba me so a, mede me ho bɛto Onyankopɔn so ara.

⁴ Ade baako na mabisa Awurade; ade baako na mehwehwɛ; sɛ mɛtena Awurade fi me nkwa nna nyinaa, na mahu n’anwonwade nyinaa, na mabisa n’akwankyerɛ. ⁵ Ɔhaw mu, ɔbɛma me guankɔbea; ɔbɛhwɛ me so wɔ ne fi na wabɔ me ho ban ɔbotan a ɛkorɔn so. ⁶ Enti medi m’atamfo a wɔatwa me ho ahyia so nkonim. Mede anigye bɛbɔ no afɔre wɔ ne fi. Mɛto dwom; mɛkamfo Awurade. ⁷ Awurade, sɛ mefrɛ wo a, tie me! Hu me mmɔbɔ na gye me so! ⁸ Wokae se, “Bra na bɛsom me.” Mibuae se, “Mɛba, Awurade.” ⁹ Mfa wo ho nhintaw me. Mma wo bo mmfuw me; mpam wo somfo. Woayɛ me boafo; nnyaw me hɔ; nkɔ nnya me, O Onyankopɔn, m’agyenkwa. ¹⁰ M’agya ne me na begyaw me hɔ, nanso Awurade bɛhwɛ me.

¹¹ Kyerɛ me, Awurade, nea wopɛ sɛ meyɛ, na di m’anim kyerɛ me kwan pa efisɛ, m’atamfo dɔɔso. ¹² Nnyaw me mma m’atamfo, wɔn a wɔde atoro ne ahunahuna ba me so no.

¹³ Minim sɛ mɛtena ase ahu Awurade papayɛ wɔ asetena yi mu.

¹⁴ Fa wo ho to Awurade so. Nya gyidi. Mpa abaw. Fa wo ho to Awurade so.