Dwom a wɔto ɔman amanehunu bere mu

¹O Awurade, daa mɛto wo dɔ a wowɔ daa no ho dwom; mɛda wo nokware no adi daa daa. ² Minim sɛ wo dɔ no bɛtena daa nyinaa, na wo nokware no tim hɔ te sɛ wim.

³ Wokae se, “Me ne onipa a mayi no no ayɛ apam; mahyɛ me somfo Dawid bɔ. ⁴ Daa w’aseni na ɔbɛyɛ ɔhene. Mɛhwɛ w’abusua so daa daa.”

⁵ Ɔsorofo to anwonwade a woyɛ ho dwom; wɔto wo nokware ho dwom, Awurade. ⁶ Obi nni soro a ɔte sɛ wo, Awurade. Ɔsorofo no biara sɛso nte sɛ wo. ⁷ Wodi wo ni w’atreneefo agyinatufo mu, na wɔde suro gyina w’anim. ⁸ Awurade Nyankopɔn Tumfoɔ, obi kɛseyɛ nsen wo. Biribiara mu, O Awurade, woyɛ ɔnokwafo.

⁹ Wo na wudi ɛpo ne tumi nyinaa so. Wobrɛ n’asorɔkye ase. ¹⁰ Wububu ɔtɔfo Rahab kum no. Wonam w’ahoɔden so dii w’atamfo so. ¹¹ Ɔsoro ne asase yɛ wo dea. Wobɔɔ wiase ne nea ɛwɔ mu nyinaa. ¹² Wobɔɔ atifi ne anafo. Bepɔw Tabor ne Bepɔw Hermon to dwom ma wo di ahurusi. ¹³ Wo tumi so! W’ahoɔden nso so!

¹⁴ Wokyekyeree w’aheman wɔ trenee ne nokware so. Ɔdɔ ne nokware da adi wɔ nea woyɛ biara mu. ¹⁵ Wɔn a wɔto nnwom de som wo no ahotɔ yɛ bebree. Saa ara nso na ɛte wɔ wɔn a wɔte adɔe hann mu no! ¹⁶ Esiane wo nti, wɔn ani gye da mu no nyinaa na wɔkamfo wo wɔ wo papayɛ ho. ¹⁷ Woma yedi nkonim akɛse; wo dɔ mu na yedi nkonim no. ¹⁸ O Awurade, wo na wuyii ɔhwɛfo maa yɛn. O, Israel Nyankopɔn Kronkron, na womaa yɛn yɛn hene.

¹⁹ Tete no, anisoadehu mu, woka kyerɛɛ wo somfo nokwafo no se, “M’aboa ɔsraani a wagye din no; mede ahengua no ama obi a mayi no afi nnipa no mu. ²⁰ Mede ngo kronkron asra m’akoa Dawid de akyerɛ sɛ ɔno na masi no ɔhene. ²¹ M’ahoɔden bɛka ne ho daa; me tumi bɛma no ahoɔden. ²² N’atamfo rentumi nni ne so da. Amumɔyɛfo rentumi nni ne so. ²³ Mebubu n’atamfo na makum obiara a ɔtan no. ²⁴ Mɛdɔ no na madi no nokware. Mɛma no adi nkonim daa. ²⁵ Mɛtrɛw n’ahemman mu fi po mu kosi Asu Efrata mu. ²⁶ Ɔbɛka akyerɛ me se, “Wone m’agya ne me Nyankopɔn; wone me hwɛfo ne m’agyenkwa.

²⁷ Mɛyɛ no m’abakan, ahene no mu nyinaa ɔkɛseɛ. ²⁸ Medi bɔ a mɛhyɛ no no so daa. Na apam a me ne no apam no nso, bɛtena hɔ daa daa. ²⁹ N’abusua bɛtena hɔ daa daa te sɛ wim. N’aseni na daa ɔbɛyɛ ɔhene. ³⁰ Nanso sɛ n’asefo anni me mmara so na sɛ wɔantena ase sɛnea me mmara te, ³¹ sɛ wobu me mmara so na wɔanni me mmara so a, ³² ɛnne, mɛtwe wɔn aso wɔ wɔn bɔne ho na mɛma wɔahu amane wɔ wɔn mfomso ho. ³³ Nanso merennyae dɔ a mede dɔ Dawid no na meremmu bɔ a mehyɛɛ no no so. ³⁴ Apam a me ne no hyɛe no nso, meremmu so, na bɔ a mehyɛɛ no no nso, merenyi mu baako mpo. ³⁵ Menam me din kronkron no so ahyɛ no bɔ prɛko. Merentwa Dawid atoro da. ³⁶ Obenya asefo daa na mɛhwɛ n’ahemman so mmere dodow a owia bɔ yi. ³⁷ Ɛbɛyɛ afebɔɔ sɛ ɔsram, ɔdansefo nokwafo a ɔwɔ wim no.”

Nkogu a ɔhene dii ho agyaadwotwa

³⁸ Nanso wo bo afuw ɔhene a wuyii no no; woatew wo ho afi ne ho na woapa no. ³⁹ Woagu apam a wo ne wo somfo pamee no atow n’ahenkyɛw ato atɛkyɛ mu. ⁴⁰ Woabubu ne kurow no afasuw nyinaa agu fam ama n’abankɛse nyinaa ayɛ amamfo. ⁴¹ Wɔn a wotwam wɔ hɔ wia n’agyapade. N’afipamfo serew no. ⁴² Wode nkonim no ama n’atamfo. Woama wɔn nyinaa anya ahotɔ. ⁴³ Woama n’akode ayɛ ɔkwa, ama wobedi no so wɔ ɔko mu. ⁴⁴ Woagye n’adehye akyeampoma atow n’ahengua akyene fam. ⁴⁵ Woama wabɔ akwakoraa mono de aniwu akata ne ho.

Ogye mpaebɔ

⁴⁶ Awurade, wode wo ho besie afebɔɔ? W’abufuw bɛhyew sɛ ogya akosi da bɛn? ⁴⁷ Kae tiaa a me nkwa nna yɛ. Kae sɛ wobɔɔ yɛn nyinaa sɛ adasamma! ⁴⁸ Hena na ɔbɛtena ase a ɔrenwu da? Ɛbɛyɛ dɛn na ɔdasani atew ne ho afi damoa ho?

⁴⁹ Awurade, wo dɔ a na wowɔ kan no ho nsɛnkyerɛnne bi wɔ he? Bɔ a wohyɛɛ Dawid no bi wɔ he? ⁵⁰ Mma wo werɛ mmfi kasatia a me a meyɛ wo somfo, wɔkasa tia me no ne sɛnea minya boasetɔ ma abosonsomfo nnome no. ⁵¹ W’atamfo kasa tia wo hene a woayi no no, O Awurade! Baabiara a ɔbɛfa no, wɔkasa tia no.

⁵² Kamfo Awurade daa daa!

Amen! Amen!