Ɔmanehunufo bɔneka

¹Mekae se, “Nea meyɛ biara, mɛhwɛ yiye na meremma me tɛkrɛma nyɛ bɔne; sɛ ɔdebɔneyɛfo bɛn me a, merenka hwee.” ² Meyɛɛ komm. Manka asɛm baako po; manka biribi a ɛfa ade pa ho. Nanso m’amanehunu kɔɔ so ara ³ maa ahopere hyɛɛ me so. Migu so redwen no, na me haw mu remia. Mantumi antena a mimmisa se, ⁴ “Awurade, mɛtena ase nna ahe? Da bɛn na mewu? Kyerɛ me bere a me nkwa bɛba awiei.” ⁵ Wɔatew me nkwa nna so! W’ani so de, me nkwa nna nka hwee. Nokware, ɔteasefo biara nsen mframa mu tutuw; ⁶ ɔnsen sunsumma. Nea ɔyɛ biara yɛ ɔkwa; ɔboa ahonya ano nanso onnim nea ɛbɛyɛ ne de. ⁷ Afei ɛdɛn na memfa me ho nto so, Awurade? Mede me ho to wo so.

⁸ Gye me fi me bɔne nyinaa mu. Na mma agyimifo nserew me.

⁹ Mɛyɛ komm. Merenka asɛm baako po efisɛ, wo na woma mihu amane saa.

¹⁰ Ntwe m’aso bio. Mereyɛ awu wɔ wo nsa ano. ¹¹ Wode animka na ɛtwe onipa bɔne aso te sɛ afofantɔ sɛe nea ɔpɛ. Nokware, afei onipa nte sɛ mframa mu tutuw bio.

¹² Tie me mpaebɔ, Awurade, na tie me sufrɛ; na sɛ misu frɛ wo a, bɛboa me. Meyɛ wo hɔho mmere tiaa bi sɛ yɛn nenanom pɛ.

¹³ Gyaa me na minnya ahotɔ ansa na mafi ha a mente ase bio.