NKYƐM A ƐTO SO ABIƐSA

NNWOM 73-89

Onyankopɔn atɛntrenee

¹Onyankopɔn ye ma Israel ne wɔn a wɔn koma mu tew ampa ara. ² Nanso anka mereyɛ apa abaw; me gyidi sae koraa, ³ efisɛ, sɛ mihu sɛ nneɛma rekɔ yiye ma ahantanfo ne amumɔyɛfo a, na m’ani abere. ⁴ Wonhu honam mu yaw; wosi pi si ta. ⁵ Wonhu amane sɛnea afoforo hu no. Ɔhaw nto wɔn sɛnea ɛto afoforo no. ⁶ Enti wɔhyɛ ahantan sɛ konmude, ne basabasa sɛ atade. ⁷ Wɔn koma hwie bɔne gu, na amumɔyɛ adwene ahyɛ wɔn adwene ma. ⁸ Wɔserew afoforo na wɔka wɔn ho nsɛm a enye. Wɔyɛ ahantan na wodwen ɔkwan a wɔbɛfa so ahyɛ wɔn so. ⁹ Wɔka bɔne fa Onyankopɔn a ɔte soro ho, na wɔahyɛ nnipa a wɔwɔ asase so ahantan so.

¹⁰ Ɛyɛ saa ma Onyankopɔn nkurɔfo dan kɔ wɔn afa, na wɔde ahopere gye wɔn nsɛm a wɔka biara di. ¹¹ Wɔka se, “Onyankopɔn renhu. Ɔsorosoroni no renhwehwɛ mu da.” ¹² Saa na amumɔyɛfo te. Wɔwɔ pii, na wonya pii ka ho. ¹³ Tew a matew me ho kronn a menyɛɛ bɔne biara no ho nni mfaso anaa? ¹⁴ O Onyankopɔn, woama mahu amane fi anɔpa kosi anwummere. Anɔpa biara wotwe m’aso. ¹⁵ Sɛ meka saa asɛm no bi a, anka merenyɛ sɛ wo nnipa no mu baako. ¹⁶ Midwen saa ɔhaw yi ho, nanso na ɛboro me so ¹⁷ kosii sɛ mekɔɔ wofi hɔ. Ɛhɔ na metee nea ɛbɛba amumɔyɛfo no so.

¹⁸ Wode wɔn begu baabi a ɛhɔ yɛ toro, na woama wɔahwe ase akɔ ɔsɛe mu! ¹⁹ Wɔsɛe wɔn prɛkopɛ na wɔn awiei ayɛ pasaa. ²⁰ Wɔte sɛ ɔdae a etwam anɔpa; sɛ wosɔre a, O Awurade, wɔyera.

²¹ Bere a na m’adwene yɛ bɔne na me nkatede yɛ opira no, ²² na magyimi sɛ aboa; mante wo ase. ²³ Nanso, na mete bɛn wo pɛɛ na wode wo nsa soo me mu. ²⁴ Wonam w’akwankyerɛ so kyerɛɛ me kwan na ewiee akyiri no, woagye me anuonyam so. ²⁵ Ɛdɛn na mewɔ wɔ soro ka wo ho? Manya wo yi, dɛn bio na mehwehwɛ wɔ asase so? ²⁶ M’adwene ne me nipadua begugow nanso, Onyankopɔn ne m’ahoɔden. Ɔno na ne ho hia me daa.

²⁷ Wɔn a wogyae wo no bɛyera. Wobɛsɛe wɔn a wonni no nokware.

²⁸ Nanso me de, minim sɛ wobɛn Onyankopɔn na wopɛ ogye wɔ Otumfoɔ Awurade no nkyɛn na wopae mu ka nea wayɛ nyinaa a, ɛyɛ anwonwasɛm.