Ɔdebɔneyɛfo ne ɔtreneeni hyɛbere

¹Mma wo werɛ nnhow wɔ nnebɔneyɛfo ho; mma w’ani mmmere wɔn a wɔyɛ bɔne. ² Wɔbɛhyew te sɛ sare a awo. Wobewu te sɛ afifide a atwintwam. ³ Fa wo ho to Awurade so na yɛ papa. Tena asase no so na bɔne amma wo so.

⁴ Hwehwɛ ahotɔ wɔ Awurade mu na ɔbɛma wo nea wo koma pɛ. ⁵ Fa wo ho ma Awurade; fa wo ho to no so na ɔbɛboa wo; ⁶ ɔbɛma wo treneeyɛ ada adi te sɛ owigyinae mu awia.

⁷ Tɔ wo bo ase na twɛn nea Awurade bɛyɛ; mma obi a odi yiye anaa wɔn a wodi nkonim wɔ wɔn bɔne mu ho asɛm nnhaw wo. ⁸ Nni awerɛhow na mma wo bo mmfuw; ɛde ɔhaw na ɛba. ⁹ Wɔn a wogye Awurade di no benya asase no; na wɔbɛpam nnebɔneyɛfo no. ¹⁰ Ɛrenkyɛ, nnebɔneyɛfo bɛyera. Wobɛhwehwɛ wɔn nanso worenhu wɔn; ¹¹ ahobrɛasefo nsa bɛka asase no na wɔanya asomdwoe.

¹² Ɔdebɔneyɛfo wowɔ ɔtreneeni ase, na ɔde ɔtan aniwa hwɛ no. ¹³ Nanso Awurade serew nnebɔneyɛfo efisɛ, onim sɛ ɛrenkyɛ na wɔasɛe wɔn. ¹⁴ Ɔdebɔneyɛfo twe ne nkrante na ɔkoa ne tadua mu de kum ahiafo, mmɔborɔfo ne atreneefo. ¹⁵ Nanso wɔn ankasa nkrante ano na wobewuwu, na wubebu wɔn tadua mu.

¹⁶ Kakra a ɔtreneeni wɔ no som bo sen nnebɔneyɛfo ahonya nyinaa ¹⁷ efisɛ, Awurade begye nnebɔneyɛfo ahoɔden na wabɔ atreneefo ho ban.

¹⁸ Awurade hwɛ wɔn a wotie no, na asase no bɛyɛ wɔn dea daa daa. ¹⁹ Wɔrenhu amane bere bɔne mu. Ɔkɔm kɛse mu wobedidi ama aso wɔn. ²⁰ Nanso nnebɔneyɛfo bewuwu. Awurade atamfo bɛyera te sɛ wuram nhwiren; wɔbɛyera te sɛ wusiw. ²¹ Ɔdebɔneyɛfo bɔ bosea, nanso ontumi ntua da, nanso ɔtreneeni yɛ ayamye! ²² Wɔn a Awurade ahyira wɔn no na wɔbɛfa asase no na wɔapam wɔn a wɔadome wɔn no.

²³ Awurade yɛ ɔkwankyerɛfo, na ɔbɔ wɔn a wɔsɔ n’ani ho ban. ²⁴ Sɛ wɔhwe ase a wɔrenka fam efisɛ, Awurade bɛma wɔn so.

²⁵ Mabɔ akora mprempren. Matena ase akyɛ nanso minhuu ɔtreneeni a Awurade agyaa no da, anaasɛ ne mma resrɛ aduan. ²⁶ Bere biara ɔma kwa, na ɔfɛm afoforo; na ne mma yɛ nhyira.

²⁷ Twe wo ho fi bɔne ho na yɛ papa na w’asefo bɛtena asase no so daa daa. ²⁸ Efisɛ, Awurade pɛ nea ɛteɛ, na onnyaw ne nkurɔfo a wogye no di. Ɔbɔ wɔn ho ban daa nyinaa. Nanso ɔbɛpam nnebɔneyɛfo asefo.

²⁹ Atreneefo benya asase no na wɔatena so daa nyinaa. ³⁰ Ɔtreneeni nsɛm mu wɔ aba, na daa ɔyɛ pɛ. ³¹ Ɔde ne Nyankopɔn mmara sie ne koma mu a ommu so.

³² Ɔdebɔneyɛfo dɛɛdɛɛ ɔtreneeni hwehwɛ sɛ okum no, ³³ nanso, Awurade nnyaa no mma ne tamfo tumi, anaa ɔmma wommu no fɔ wɔ asennii.

³⁴ Ma w’ani nna Awurade so na di ne mmara so; ɔde asase no bɛma wo de ahyɛ wo anuonyam, na wubehu sɛ wɔbɛpam ɔdebɔneyɛfo no. ³⁵ Bere bi na minim ɔdebɔneyɛfo bi a na ɔtane nnipa ani. Ɔkorɔn sen obiara te sɛ Lebanon sida. ³⁶ Akyiri yi, mefaa hɔ nanso manhu no. Mehwehwɛɛ no, nanso manhu no. ³⁷ Hwɛ sɛnea onipa pa no brɛ n’ani ase hwɛ ɔtreneeni no. Ɔsomdwoeni wɔ asefo, ³⁸ nanso nnebɔneyɛfo de, wɔsɛe wɔn koraa na wɔpopa wɔn asefo.

³⁹ Awurade gye atreneefo nkwa na ɔbɔ wɔn ho ban fi amane mu. ⁴⁰ Ɔboa wɔn, gye wɔn; ogye wɔn fi nnebɔneyɛfo nsam efisɛ, wɔde no yɛ wɔn guankɔbea.