Ayeyi Dwom

¹Mo a moyɛ atreneefo, nea Awurade ayɛ nti, monteɛm nni ahurusi; mo a mutie no, monkamfo no. ² Monna Awurade ase wɔ asanku so na momfa asanku a nhama gu so nto nnwom mma no. ³ Monto dwom foforo mma no. Momfa nyansa mmɔ sanku no na monteɛm ahurusi so!

⁴ Awurade nsɛm yɛ nokware na ne nnwuma biara nni huammɔ. ⁵ Awurade dɔ nea ɛyɛ trenee na ɛyɛ pɛ. Ne dɔ hyɛ asase so ma daa. ⁶ Awurade nam ne tumi so na ɔbɔɔ soro, owia, ɔsram ne nsoromma a efi n’anom asɛm so. ⁷ Ɔboaa ɛpo nyinaa ano koguu faako. Ɔtoo ɛpo hahanaa no mu wɔ n’akorae. ⁸ Asase sofo nyinaa, munsuro Awurade! Wiasefo nyinaa, monhyɛ no anuonyam. ⁹ Ɔkasae na wɔbɔɔ asase; na ne tumi mu na biribiara bae. ¹⁰ Awurade maa amanaman nsusuwii kae. Wamma wɔanyɛ wɔn nhyehyɛe. ¹¹ Nanso, ɔno de, ne nhyehyɛe wɔ hɔ daa. Ne botae wɔ hɔ daa nyinaa.

¹² Asomdwoe nka kurow a ne Nyankopɔn ne Awurade. Nhyira nka nnipa a wayi wɔn sɛ ne de! ¹³ Awurade hwɛ adasamma nyinaa fi soro. ¹⁴ Ofi baabi a odi hene no hwɛ wɔn a wɔte asase so nyinaa. ¹⁵ Onim wɔn komam na onim nea wɔyɛ nyinaa.

¹⁶ Ɛnyɛ ɔhene asraafo tumi so na ɔnam di nkonim. Ɛnyɛ ɔsraani ahoɔden so na ɔnam di nkonim. ¹⁷ Ɔsa mu apɔnkɔ ho nni mfaso wɔ nkonimdi mu. Wɔn ahoɔden ntumi nnye nkwa.

¹⁸ Awurade hwɛ wɔn a wotie no ne wɔn a wɔde wɔn ho to ne dɔ no so daa. ¹⁹ Ogye wɔn fi owu mu. Ɔkɔm kɛse mu, ɔhwɛ wɔn. ²⁰ Yɛn ani da Awurade so. Ɔyɛ yɛn guankɔbea ne yɛn boafo. ²¹ Ne nti, yɛn ani agye. Yegye ne din kronkron no di. ²² Ma wo dɔ a wodɔ yɛn daa no nka yɛn ho, Awurade, wɔ bere a yɛde yɛn ho to wo so yi.