Ɔtreneeni mpaebɔ

¹O Awurade, tie me sufrɛ na bu atɛn; tie me su na boa me! Tie me mpaebɔ a efi adwene pa mu no. ² Wubebu me bem efisɛ, wunim ade trenee. ³ Wunim me koma mu. Woaba me nkyɛn anadwo; woahwehwɛ me mu nyinaa na woahu sɛ bɔnepɛ biara nni me mu. ⁴ Menka bɔne sɛnea afoforo yɛ no. Madi wo mmara so na mapae afi basabasayɛ kwan so. ⁵ Menam wo kwan so daa, na mentoo kwan.

⁶ Mebɔ mpae, O Onyankopɔn efisɛ, wugye me so; enti dan w’ani kyerɛ me, na tie me nsɛm. ⁷ Da wo dɔ nwonwaso no adi na gye yɛn nkwa; wo nkyɛn mu de, atamfo rentumi nyɛ yɛn hwee. Bɔ me ho ban sɛnea wobɔ w’ani ho ban. ⁸ Fa me hyɛ wo ntaban nwini no ase fi amumɔyɛfo nsam.

⁹ M’atamfo atwa me ho ahyia a awudi wɔ wɔn aniwa mu. ¹⁰ Wonni ahummɔbɔ, na wɔkasa ahantan so. ¹¹ Baabiara a mɛfa no, wɔka me ho pɛ sɛ wotwa me hwe fam. ¹² Wɔte sɛ agyata a wɔretwɛn me atetew me mu asinasin.

¹³ Bra, Awurade! Wo ne m’atamfo nni asi na di wɔn so! Fa wo nkrante no gye me fi nnebɔneyɛfo nsam. ¹⁴ Gye me fi wɔn a wɔanya nea wɔrehwehwɛ wɔ wiase yi mu nyinaa no nsam. Fa asotwe a woakora ama wɔn no twe wɔn aso. Ma ebi nka mma wɔn mma ne wɔn mma mma!

¹⁵ Nanso mehu wo efisɛ, menyɛɛ bɔne biara; na sɛ minyan a, hu a mihu wo no ma me anigye.