Onyankopɔn nokwafo baako pɛ no

¹Wo nko, O Awurade, wo nko, na ɛnyɛ yɛn, na ɛsɛ sɛ wɔhyɛ yɛn anuonyam, esiane wo dɔ a ɛwɔ hɔ daa ne wo trenee nti. ² Adɛn nti na ɛsɛ sɛ aman bisa yɛn se, “Mo Nyankopɔn wɔ he?”

³ Yɛn Nyankopɔn wɔ soro; ɔyɛ nea ɔpɛ. ⁴ Wɔde dwetɛ ne sikakɔkɔɔ a wɔnam onipa nsa so na ayɛ wɔn anyame. ⁵ Wɔwɔ ano, nanso wontumi nkasa. Wɔwɔ ani, nanso wonhu ade. ⁶ Wɔwɔ aso, nanso wɔnte asɛm. Wɔwɔ hwene, nanso wɔnte ade. ⁷ Wɔwɔ nsa, nanso wɔnte nka. Wɔwɔ nan, nanso wɔnnantew. Wontumi nso nnyigye. ⁸ Ma wɔn a wɔyɛɛ wɔn na wɔwɔ wɔn mu gyidi no nyɛ sɛ ahoni no ara.

⁹ Mo Israelfo, momfa mo ho nto Awurade so. Ɔboa mo na ɔbɔ mo ho ban. ¹⁰ Onyankopɔn asɔfo, momfa mo ho nto Awurade so. Ɔboa mo na ɔbɔ mo ho ban. ¹¹ Mo a mosom no nyinaa momfa mo ho nto Awurade so. Ɔboa mo na ɔbɔ mo ho ban.

¹² Awurade kae yɛn na obehyira yɛn. Obehyira Israelfo ne Onyankopɔn asɔfo nyinaa. ¹³ Obehyira obiara a odi no ni; akɛse ne nkumaa nyinaa pɛ. ¹⁴ Awurade mma, mo ne mo asefo nyinaa nwo mma! ¹⁵ Awurade a ɔbɔɔ ɔsoro ne asase no nhyira mo. ¹⁶ Ɔsoro yɛ Awurade nko de, na ɔde asase maa onipa.

¹⁷ Awufo nkamfo Awurade. Saa ara nso na wɔn a wɔkɔ ase dinn beae hɔ no nkamfo Awurade. ¹⁸ Nanso yɛn ateasefo bɛda no ase nnɛ ne daa nyinaa. Kamfo Awurade!