Salmo 136

¹Pasalamati ang Ginoo kay maayo siya.
Ang iya gugma wala sing katapusan.
² Pasalamati ang Dios nga labaw sa tanan nga dios.
Ang iya gugma wala sing katapusan.
³ Pasalamati ang Ginoo nga labaw sa tanan nga ginoo.
Ang iya gugma wala sing katapusan.
⁴ Siya lang gid ang nagahimo sang makatilingala nga mga butang.
Ang iya gugma wala sing katapusan.
⁵ Paagi sa iya kaalam, ginhimo niya ang kalangitan.
Ang iya gugma wala sing katapusan.
⁶ Ginplastar niya ang duta sa ibabaw sang tubig.
Ang iya gugma wala sing katapusan.
⁷ Ginhimo niya ang adlaw kag ang bulan.
Ang iya gugma wala sing katapusan.
⁸ Ginhimo niya ang adlaw sa paghatag kasanag kon adlaw.
Ang iya gugma wala sing katapusan.
⁹ Ginhimo niya ang bulan kag ang mga bituon sa paghatag kasanag kon gab-i.
Ang iya gugma wala sing katapusan.
¹⁰ Ginpamatay niya ang mga kamagulangan nga lalaki sang mga taga-Egipto.
Ang iya gugma wala sing katapusan.
¹¹ Ginpaguwa niya ang mga Israelinhon sa Egipto.
Ang iya gugma wala sing katapusan.
¹² Ginpaguwa niya sila paagi sa iya dako nga gahom.
Ang iya gugma wala sing katapusan.
¹³ Ginpahawa niya ang Mapula nga Dagat.
Ang iya gugma wala sing katapusan.
¹⁴ Kag ginpatabok niya ang iya katawhan sa tunga sini.
Ang iya gugma wala sing katapusan.
¹⁵ Pero ginlumos niya ang hari sang Egipto^[a] kag ang iya sini mga soldado didto sa Mapula nga Dagat.
Ang iya gugma wala sing katapusan.
¹⁶ Gintuytuyan niya ang iya katawhan sa kamingawan.
Ang iya gugma wala sing katapusan.
¹⁷ Ginpanglaglag niya ang gamhanan nga mga hari.
Ang iya gugma wala sing katapusan.
¹⁸ Ginpamatay niya ang bantog nga mga hari.
Ang iya gugma wala sing katapusan.
¹⁹ Ginpatay niya si Sihon, ang hari sang mga Amornon.
Ang iya gugma wala sing katapusan.
²⁰ Ginpatay man niya si Og, ang hari sang Bashan.
Ang iya gugma wala sing katapusan.
²¹ Ginhatag niya ang ila duta sa iya katawhan agod ila panag-iyahan.
Ang iya gugma wala sing katapusan.
²² Ini nga duta ginapanag-iyahan sang katawhan sang Israel nga iya mga alagad.
Ang iya gugma wala sing katapusan.
²³ Gindumdom niya kita sang indi maayo ang aton kahimtangan.
Ang iya gugma wala sing katapusan.
²⁴ Ginluwas niya kita sa aton mga kaaway.
Ang iya gugma wala sing katapusan.
²⁵ Ginhatagan niya sang pagkaon ang tanan niya nga tinuga.
Ang iya gugma wala sing katapusan.
²⁶ Pasalamati ang Dios sang langit.^[b]
Ang iya gugma wala sing katapusan.