Salmo 107

⁴ May mga tawo nga nagpanglakaton sa kamingawan;
indi nila makita ang alagyan pakadto sa siyudad nga may nagaestar nga mga tawo.^[a]
5 Gin-gutom sila kag gin-uhaw, kag daw mapatay na sila.
⁶ Sa ila nga kalisod, nagpanawag sila sa Ginoo,
kag ginluwas niya sila.
⁷ Gintuytuyan niya sila sa dalan nga deretso sa siyudad nga may nagaestar nga mga tawo.^[b]
8 Dapat magpasalamat sila sa Ginoo tungod sang iya gugma kag sang iya makatilingala nga mga binuhatan sa mga tawo.
⁹ Kay ginapainom niya ang mga ginauhaw kag ginapakaon ang mga ginagutom.

¹⁰ May mga tawo nga ginpriso nga ginakadenahan
kag nagapungko sila sa madulom gid nga prisohan.
¹¹ Napriso sila kay nagpamatok sila sa mga ginsiling sang Labing Mataas nga Dios kag ginbaliwala nila ang iya mga laygay.
¹² Gani ginpabudlayan niya sila sa ila mabug-at nga mga trabaho.
Nagkalatumba sila pero wala sing may nagbulig sa ila.
¹³ Sa ila kalisod, nagpanawag sila sa Ginoo,
kag ginluwas niya sila.
¹⁴ Ginpamugto niya ang ila mga kadena
kag ginpanguha niya sila sa madulom gid nga prisohan.
¹⁵ Dapat magpasalamat sila sa Ginoo tungod sang iya gugma kag sang iya makatilingala nga mga binuhatan sa mga tawo.
¹⁶ Kay ginapangguba niya ang mga puwertahan nga saway
kag ginapangbali ang mga rehas nga salsalon.

¹⁷ May mga buang-buang nga nagaantos tungod sang ila mga paglapas kag kalautan.
¹⁸ Nalainan sila sang tanan nga pagkaon kag dali na lang sila mapatay.
¹⁹ Sa ila kalisod, nagpanawag sila sa Ginoo,
kag ginluwas niya sila.
²⁰ Nagmando siya sang kaayuhan kag nag-alayo sila.
Ginluwas niya sila sa kamatayon.
²¹ Dapat magpasalamat sila sa Ginoo tungod sang iya gugma kag sang iya makatilingala nga mga binuhatan sa mga tawo.
²² Dapat maghalad sila bilang pasalamat sa Dios;
kag samtang nagakanta sila sa kalipay isugid nila ang iya mga binuhatan.

²³ May mga tawo nga nagsakay sa mga barko kag nagpanakayon sa kadagatan, nga amo ang ila palangabuhian.
²⁴ Nakita nila ang makatilingala nga mga binuhatan sang Ginoo sa kadagatan.
²⁵ Sa iya nga pagmando, naghangin sing mabaskog kag nagdalagko ang mga balod.
²⁶ Gani nagpaibabaw ang ila sakayan kag dayon nagpaidalom.
Nadulaan sila sang kaisog sa sina nga katalagman.
²⁷ Nagduling-duling sila pareho sa hubog
kag indi na sila makahibalo kon ano ang ila himuon.
²⁸ Sa ila kalisod, nagpanawag sila sa Ginoo,
kag ginbuligan niya sila.
²⁹ Ginpauntat niya ang mabaskog nga hangin kag naglinaw ang dagat.
³⁰ Nalipay sila sang maglinaw na,
kag gintuytuyan sila sang Dios sa dulungkaan nga ginahandom nila.
³¹ Dapat magpasalamat sila sa Ginoo tungod sang iya gugma kag sang iya makatilingala nga mga binuhatan sa mga tawo.
³² Dapat nga padunggan nila ang Dios sa ila pagtililipon
kag dayawon man nila siya sa pagtililipon sang ila mga manugdumala.

³³ Ginahimo sang Ginoo ang mga suba nga desierto,
kag ginahimo niya ang mga tuburan nga mamala nga duta.
³⁴ Ginahimo niya ang maayo nga duta nga wala sing pulos,
tungod sang mga kalautan sang mga nagaestar dira.
³⁵ Ginahimo niya ang desierto nga mga katubigan,
kag ginahimo niya ang mamala nga mga duta nga mga tuburan.
³⁶ Ginapaestar niya ang mga ginagutom sa sina nga lugar
kag nagatukod sila dira sang siyudad nga ila estaran.
³⁷ Nagasab-og sila sa mga latagon kag nagatanom sang ubas,
kag bugana ang ila mga patubas.
³⁸ Ginapakamaayo sila sang Dios, kag nagadamo gid sila.
Bisan ang ila mga kasapatan wala niya ginatugutan nga magdiutay.

³⁹ Kon nagadiutay sila kag nagakahuy-an tungod sang pagpigos, pagsakit, kag pagpaantos sa ila,
⁴⁰ ginapakalain sang Dios ang mga nagapigos sa ila
kag ginapatalang sa desierto nga wala sing mga dalan.
⁴¹ Pero ginabuligan niya sila nga mga kubos sa ila mga pag-antos,
kag ginapadamo niya ang ila mga pamilya pareho sa mga panong sang kasapatan.

⁴² Nakita ini sang mga matarong kag nagakalipay sila,
pero ang tanan nga malaot wala gid sing may masiling.

⁴³ Ang mga maalamon dapat gid magtipig sang sini nga mga butang;
dapat hunahunaon nila ang dako nga gugma sang Ginoo.