Jesusca jatun Mandaj shinatajmi Jerusalenman yaicushca

¹Jesusca, Paipaj yachacujcunandij Jerusalenman c'uchuyamushpaca, Olivos yuracuna tiyan urcu c'uchullapi caj Betfagé pueblomanmi chayarca. Chaiman chayashpaca Jesusca, Paipaj yachacujcunamanta ishquitami, ² cashna nishpa cacharca: «Ch'imba ashalla huasicuna tiyanman richij. Chaipica, huahuandij mama burromi huatashca shayacunga. Chaita cacharishpa pushamugrichij. ³ Cacharicujpi maijan imata nijpica: “Apu Jesús pushamuchun nijpimi pushacunchij, ñallami saquij cachanga” ninguichij» nircami.

⁴ Dios ima nishcata huillaj huillashca pajtachunmi, chashnaca tucurca. Paica cashnami nishca:

⁶ Chai ishqui yachacujcuna rishpaca, Jesús mandashca shinami rurarcacuna. ⁷ Huahuandij mama burrota Jesuspajman apamushpaca, paicunapaj jahua churanata burrocunapaj jahuapi churajpi Jesusca tiyarircami. ⁸ Jesushuan ricuj chai tucui gentecunami, paicunapaj churanacunata Jesuspaj ñaupaj ñanpi mantarcacuna. Cutin maijancunaca, yura ramacunata p'itishpami, ñanpi churarcacuna. ⁹ Chai tucui gentecunaca ñaupacujcunapish, caticujcunapish:

¹⁰ Jerusalenman Jesús ña yaicujpica, tucuicunami:

–¿Pitaj cai runaca?– nishpa, achcata mancharircacuna.

¹¹ Chaimantami, Paihuan shamujcunaca:

–Paica, Dios ima nishcata huillajmari. Galileapi caj Nazaretmantamari– nircacunami.

Diospaj huasipi c'atucujcunatami Jesús llujshichishca

¹² Diospaj huasiman Jesús yaicushpaca, chaipi c'atucuj randicujcunataca, tucuicunatami llujshichishpa cacharca. Cullquita cambiajcunapaj meźacunatapish, palomacunata c'atucujcuna tiyacushcatapish t'angashpami, pambaman shitarca. ¹³ Chashna rurashpami, Jesusca cashna nirca: «Dios Quillcachishcapica: “Ñuca huasica, ñucata mañana huasimi canga” ninmi. Ashtahuanpish cancunaca, shuhuacunapaj jutcutamari rurashcanguichij» nircami.

¹⁴ Jesús Diospaj huasipi cajpica, ñahui mana ricujcuna, suchucuna shamujpi tucuicunatami alliyachirca. ¹⁵ Diospaj huasipi Jesús chashna mancharinacunata rurajtaca, curacunata mandajcunapish, Mandashcata yachachijcunapish ricurcacunami. Shinallataj: «Davidpaj Churi, canca allimari cangui» nishpa huambracuna caparicujtapish uyarcacunami. Chaimantami paicunaca, achcata p'iñarircacuna. ¹⁶ Chashna p'iñarishpami Jesustaca:

–Cai huambracuna ima shina caparicujtaca, ¿uyanguichu?– nishpa tapurcacuna.

Chashna tapujpimi, Jesusca:

–Ari, uyanitajmari. Dios Quillcachishcapica:

nishcataca, ¿manachu shuj cutillapish ricushcanguichij?– nirca.

¹⁷ Chashna nishpaca paicunata saquishpa, Jerusalenmanta Betaniaman rishpaca, chaipimi pacarirca.

Higo yuratami Jesusca ama ashtahuan p'ucuchun nishca

¹⁸ Jesusca cayandij tutamanta utcata Jerusalenman tigracushpami, yaricachirca. ¹⁹ Chaimantami, ñan c'uchullapi shayacuj higo yurata ricushpaca, chaiman c'uchuyarca. Shuj granollapish illaj, chushaj p'angacunalla junda cashcata ricushpami, chai yurataca:

–¡Cunanmantaca, ña ama p'ucungui!– nishpa rimarca.

Chashna nijpica, chai yuraca ñapish chaquirircallami. ²⁰ Jesuspaj yachacujcuna chaita ricushpaca, achcata mancharishpami:

–¿Ima shinataj cai higo yuraca, can rimanca chaquirinllachu, imamí?– nishpa tapurcacuna.

²¹ Chashna tapujpi, Jesusca cashnami nirca:

–Mana caita chaita yuyashpa, chashnataj ruranata crishpaca, cancunapish higo yurata ñuca chaquichishca shinallataca, mana rurai tucunguichijchu. Ashtahuanpish, cai urcuta: “Caimanta anchushpa, mama cuchapi siririgri” nijpica, cai urcuca rinmanllami, chaica chashnami. ²² Ima mañashcatapish cuna cashcata crishpa mañashpaca, japinguichijllami– nircami.

‘¿Pitaj Cantaca chashna rurachun cacharca?’ nishcacunami

²³ Chai q'uipami Jesusca, Diospaj huasiman yaicushpa yachachicurca. Chaipi yachachicujpica mandajcunapish, cunaj yuyajcunapish Jesuspajman shamushpami:

–¿Pitaj caicunataca rurachicun? ¿Pitaj cantaca cashna rurachun cacharca?– nishpa tapurcacuna.

²⁴ Jesusca cashnami nirca:

–Ñucapish cancunataca, shuj shimillata tapusha. Chaita huillajpica, ñucapish pi caicunata rurachicushcata huillashami. ²⁵ Bautiźaj Juan bautiźachunca, ¿jahua pacha Dioschu, runacunachu, pitaj cachashca canga?– nishpa tapujpimi, paicunapura cashna parlanacurcacuna:

«“Juantaca, jahua pacha Diosmi cacharca” nijpica: “Shinashpaca, ¿ima nishpataj Juan huillashcata mana crircanguichij?” ningami. ²⁶ “Runacunallami Juantaca cacharca” nijpica, ¿gentecunaca imatashi ninga? Tucuicunamari Juantaca, Dios ima nishcata huillaj cashcata crincuna» ninacurcacunami.

²⁷ Chashna ninacushpami, Jesusmanca:

–Manamari yachanchijchu– nircacuna.

Shina nijpimi, Jesusca:

–Shinashpaca, ñucapish pi caicunata rurachun cachashcataca, mana huillashachu– nirca.

Ishqui churicunahuan ch'imbapurashpa yuyachishca parlomi

²⁸ –¿Caica cancunapica, imataj yuyachin?

Shuj runami ishqui churita charirca. Chai runaca, punta churitami: “Riqui huahua, cunan punlla ñuca chagrapi uvasta pallagri” nirca. ²⁹ Shina nijpi chai churica: “Mana rishachu” nicushpapish, q'uipata alli yuyarishpaca rircallami. ³⁰ Chai runaca caishuj churipajman rishpaca, ñaupa churita nishca shinallatajmi nirca. Chashna nijpi chai churica: “Ari yayito, rishami” nishpapish, mana rircachu. ³¹ Chai ishqui churimantaca, ¿maijantaj yaya munashcataca rurarca?– nijpimi, paicunaca:

–Ñaupa churimi yaya munashcata rurashca– nircacuna.

Chashna nijpica, Jesusca cashnami nirca:

–Impuestota japijcunaraj, huainayashpa causaj huarmicunarajmi, Dios mandacunmanca cancunapaj ñaupa yaicungacuna, chaica chashnatajmi. ³² Bautiźaj Juan shamushpa, Diosman cutirichun yachachicujpipish, mana crircanguichijchu. Ashtahuanpish impuestota japijcunaraj, huainayashpa causaj huarmicunarajmi, pai huillashcataca crircacuna. Chaita ricushpapish cancunaca, Juan huillashcataca mana crircanguichijchu, manataj Diospajman cutirircanguichijchu.

Chacarerocunahuan ch'imbapurashpa yuyachishca parlomi

³³ Yuyachij cai parlotapish alli uyaichij. Shuj runami paipaj allpapi, uvasta tarpurca. Chagra muyundijtaca rumicunahuanmi pircarca. Chai allpallapitajmi, uvasta capingapajpish shuj tanqueta rurarca. Chapangapajpish, shuj torretami pircarca. Chai q'uipaca chagrayujca, uvas chagrata shuj chacarerocunaman mingashpa, caru llajtaman rircallami. ³⁴ Uvasta pallana punllacuna ña chayamujpica, chai chagrayujca pai japina cashcata chaupimuchunmi, paipaj servijcunataca, chagrajcunapajman cacharca. ³⁵ Ashtahuanpish chagrajcunaca, chai servijcuna chayajpica japishcahuanmi shujtaca macarca, caishujtaca huañuchirca, shujtaca rumicunahuan shitashpa cacharcacuna. ³⁶ Chashna rurajpipish chagrayujca, ñaupaman cachashcata yalli tauca runacunatami cacharca. Chaicunatapish ñaupaman cachashcacunata shinallatajmi rurarcacuna.

³⁷ Tucui chaicunata cachashca q'uipaca, chagrayujca: ‘Ñuca churitatajca manchangacunami’ nishpami, paita cacharca. ³⁸ Ashtahuanpish paipaj churi shamucujta ricushpacarin, chai runacunaca paicunapura: “Caimari cai tucuitaca japinga. Ñucanchij japingapaj paitaca huañuchishunchij” ninacurcami. ³⁹ Shina ninacushpami, paitaca uvas chagramanta llujshichishpa huañuchircacuna.

⁴⁰ Chashna ruraj runacunataca chagrayuj shamushpaca, ¿imatashi ruranga?– nishpami tapurca.

⁴¹ Chashna tapujpica paicunaca, cashnami nircacuna:

–Chashna ruraj millai runacunataca, mana llaquishpa huañuchinmanca. Chagratapish, uvas p'ucujpi chaupishpa cuipaj shujtajcunaman cunmanca– nircacunami.

⁴² Shina nijpi Jesusca, cashnami nirca:

–Dios Quillcachishcapi imata nicujtaca, ¿manatajchu ricushcanguichij imatagari? Chaipica cashnamari nicun:

⁴³ Chaimanta caita huillanimi: Taita Diosca, Pai mandacushcataca cancunata quichushpami, Paita alli caźuj shujtajcunaman cunga. ⁴⁴ Maijan chai Rumipi urmashpaca, p'aquiringami. Maijanpaj jahuapi chai Rumi urmashpacarin, ñutungamari– nircami.

⁴⁵ Yuyachij chai parlocunata uyashpaca, curacunata mandajcunapish, fariseocunapishmi, ‘Ñucanchijtamari chashna rimacushca’ nirircacuna. ⁴⁶ Chaimantami, Jesustaca huañuchingapaj japishun nircacuna. Shina cajpipish Jesustaca, ‘Dios ima nishcata huillajmi’ ninacuj cajpi, tucuicunata manchashpami, mana imata rurai tucurcacuna.