Marcos 11

Jesusca jatun Mandaj shinatajmi Jerusalenman yaicushca

¹Ñami Jerusalén c'uchullapi caj Betfagé, shuti, Betania shuti llajtacunaman chayarcacuna. Chaica, Olivos urcu ch'imbapurapimi. Chaipi cashpami Jesusca, Paipaj ishqui yachacujcunata cacharca. ²Paicunataca cashnami nirca: «Cancunapaj ch'imbanijpi caj, chai ashalla huasicuna tiyanman richij. Chaiman chayashpaca, pi manaraj tiyarishca burritotami huatashca shayacujta japinguichij. Chaitaca cacharishpa pushamuichijlla. ³Cacharicujpi pipish: “¿Imapajtaj chashna ruracunguichij?” nijpica: ‘Apunchij Jesusmi pushaj cacharca, ñallami saquij cachapanga’ ninguichij» nircami.

⁴Chashna nijpi rishpaca, quingu ñan uri, canlla pungupi malta c'ari burro huatashca shayacujta japishpami cacharicurcacuna. ⁵Chashna ruracujpimi, chaipi cajcunamanta shujca: «¿Imapajtaj burritotaca cacharicunguichij?» nishpa tapurca. ⁶Jesús nishca shinallataj huillajpica, apachun saquircallami. ⁷Burrota Jesuspajman apamushpaca, churanacunata burropaj jahuapi churajpimi, Jesusca tiyarirca. ⁸Shinallataj achcacunami, paicunapaj churanacunata ñanpi mantarcacuna. Shujtajcunaca, yura maquicunata p'itishpami, tucui ñanta churarcacuna. ⁹Chaimantaca ñaupacujcunapish, caticujcunapish cashnami caparircacuna:

¹¹Jesusca Jerusalenman chayashpaca, Diospaj huasiman yaicushpami, tucuita ricurca. Chai q'uipaca, ña tutayacujpimi chunga ishquita pushashpa Betaniaman rirca.

Higo yuratami Jesusca ama ashtahuan p'ucuchun nishca

¹²Cayandij punllaca Betaniamanta ricushpami, Jesusca yaricachirca. ¹³Carumanta shuj p'angasapa higo yurata ricushpami, ‘Shuj granollapish tiyanpishchari’ nishpa ricunaman rirca. Chaiman c'uchuyashpaca, manaraj higo tiyana punllacuna cashcamantami p'angacunalla junda cashcata ricurca. ¹⁴Chaimantami Jesusca, higo yurataca:

–¡Cunanmantapacha pipish amataj canmantaca micuchun!– nijtaca, Paipaj yachacujcunapish uyarcacunami.

¹⁵Jerusalenman ña shayashpaca, Diospaj huasimanmi Jesusca yaicurca. Chai ucumantaca c'atucujcunatapish, randijcunatapishmi llujshichi callarirca. Shinallataj cullquita cambiajcunapaj meźacunatapish, palomacunata c'atujcuna tiyarinatapishmi singuchishpa shitarca. ¹⁶Diospaj huasi ucuta imata apashca, caiman chaiman pasachunpish pita mana saquircachu. ¹⁷Chai q'uipami, cashna nishpa yachachirca: «¿Manachu Dios Quillcachishcapica: “Ñuca huasica, tucui llajtacuna Ñucata mañana huasimi canga” nicujta ricunguichij? Ashtahuanpish cancunaca “shuhuacunapaj jutcutamari” rurashcanguichij» nircami.

¹⁸Chashna nijtaca Mandashcata yachachijcunapish, pushaj curacunapish uyarcacunami. Chaimantami, ima shina huañuchinata mashcarcacuna. Tucuicunallataj Pai yachachishcata ‘Allimi’ nishpa mancharinacucujpimi, mana imata rurai tucurcacuna.

¹⁹Tutayamujpica, Jesusca chai pueblomanta llujshishpa rircallami.

Jesús rimashca higo yuraca chaquirishcami

²⁰Cayandij tutamantaca, higo yura c'uchuta pasacushpami, sapimantataj chaquirishcata ricurcacuna. ²¹Chaita ricushpa yuyarishpami, Pedroca:

–¡Yachachij, riquiari Can ama p'ucuchun nishca higo yuraca chaquirishcamari!– nircami.

²²Jesusca, cashnami nirca:

–Taita Diosta crichij. ²³Chashnataj tucunata shunguhuantaj crishpa, maijanpish cai urcuta: “Caimanta anchushpa, cuchapi siririgri” nijpica, pai nishca shinataj tucungallami. Imapish pai nishca shinami ruraringa. Chaica chashnatajmi. ²⁴Chaimanta cancuna imata mañashpaca, japinatataj crishpa mañaichijlla, mañashca shina chasquinguichijtajmi. ²⁵Cancuna mañangapajca, pihuan p'iñanacushca cashpaca, chaitaraj allichinguichij. Cancunapura allichijpimi, jahua pachapi tiyacuj Yayapish cancuna mana alli rurashcataca p'ichanga. ²⁶Cancuna mana perdonajpica, jahua pachapi caj cancunapaj Yayapish, cancunapaj juchacunataca mana perdonangachu– nircami.

‘¿Pitaj Cantaca chashna rurachun cacharca?’ nishcacunami

²⁷Jerusalenman cutin tigrashpa Diospaj huasipi puricujpica, pushaj curacunapish, Mandashcata yachachijcunapish, cunaj yuyajcunapishmi Jesuspajman shamurcacuna.

²⁸Paicunami:

–¿Pitaj caicunataca rurachicun? ¿Pitaj Cantaca cashna rurachun cacharca?– nishpa tapurcacuna.

²⁹Jesusca cashnami cutichirca:

–Ñucapish cancunata shuj shimillata tapusha. Chaita cutichijpica, Ñucapish pi mandajpi caita ruracushcataca huillashallami. ³⁰¿Bautiźaj Juan bautiźachunca, jahua pacha Dioschu, runacunachu cachashca canga?– nircami.

³¹Chashna tapujpimi, paicunapura cashna parlanacurcacuna: «“Juantaca, jahua pacha Diosmi cacharca” nijpica: “Shinashpaca, ¿ima nishpataj Juan huillashcata mana crircanguichij?” ningami. ³²“Runacunallami Juantaca cacharca” nijpipish, ¿gentecunaca imatashi ninga? Tucuicunamari Juantaca, Dios ima nishcata huillaj cashcata crincuna» ninacurcami.

³³Chashna yuyarinacushpami, Jesusmanca:

–Mana yachanchijchu– nircacuna.

Chaimantami Jesuspish:

–Shinashpaca, Ñucapish pi mandajpi caicunata ruracushcataca mana huillashachu– nircami.