¹Dayon nagsiling si Elihu, ² “Kamo nga nagasiling nga maalamon kamo kag madamo sang nahibaluan, pamatii ninyo ako sing maayo. ³ Kay subong nga ang dila makahibalo kon ano ang manamit kag ang indi manamit nga pagkaon, ang dulunggan makahibalo man kon ano ang husto ukon indi husto nga mga pulong. ⁴ Gani hibaluon naton kon ano ang husto; tun-an naton kon ano ang maayo. ⁵ Kay nagsiling si Job, ‘Inosente ako pero wala ako ginhatagan sang Dios sang hustisya. ⁶ Bisan matarong ako, ginakabig ako nga butigon. Bisan wala ako sing sala nga nahimo, ginhatagan niya ako sang balatian nga wala sing kaayuhan.’

⁷ “Wala sing tawo nga pareho kay Job nga ginauhaw sa pagtamay. ⁸ Nanamian siya mag-upod sa malaot kag makasasala nga mga tawo. ⁹ Kay nagasiling siya, ‘Wala sing makuha ang tawo kon magtinguha siya sa paglipay sa Dios.’ ¹⁰ Gani magpamati kamo sa akon, kamo nga nagasiling nga nakaintiendi kamo. Ang Makagagahom nga Dios wala nagahimo sing malain. ¹¹ Ginabalusan niya ang tawo suno sa iya binuhatan; ginatratar niya siya suno sa nagakabagay sa iya pamatasan. ¹² Imposible nga maghimo ang Makagagahom nga Dios sing malain. Indi niya mahimo nga tikuon ang hustisya. ¹³ May nagsugo bala sa iya sa pagdumala sa bug-os nga kalibutan? Siyempre wala! ¹⁴ Kon pagbuot sang Dios nga kuhaon ang ginhawa nga ginhatag niya sa tawo, ¹⁵ magakalamatay ang tanan nga tawo kag magabalik sa duta.

¹⁶ “Kon may pag-intiendi ka, Job, pamatii ining akon ihambal: ¹⁷ Makadumala bala ang Dios kon indi niya gusto ang hustisya? Ti, ngaa ginapakalain mo ang matarong kag gamhanan nga Dios? ¹⁸ Indi bala nga kon malaot kag wala sing pulos ang mga hari kag mga opisyal ginasabdong niya sila? ¹⁹ Wala siya sing may ginapasulabi sa mga pangulo, kag wala niya ginapaboran ang mga manggaranon sa mga imol, kay sila tanan pareho niya nga ginhimo. ²⁰ Bisan ang gamhanan nga mga tawo mapatay gulpi sa kagab-ihon, nga wala sing may nagtandog sa ila. ²¹ Ginabantayan gid sang Dios ang tanan nga ginahimo sang tawo. ²² Wala gid sing madulom nga lugar nga sa diin makapanago ang mga malaot. ²³ Indi na kinahanglan nga tawgon pa sang Dios ang tawo nga magkadto sa iya atubangan agod usisaon kag hukman. ²⁴ Indi na kinahanglan nga mag-imbistigar pa siya kon pahalinon na niya ang gamhanan nga mga tawo sa ila posisyon kag buslan sang iban. ²⁵ Tungod nga nahibaluan niya ang ila ginahimo, ginakuhaan niya sila sang gahom kag ginalaglag bisan sa kagab-ihon. ²⁶ Ginasilutan niya sila sa atubangan sang mga tawo tungod sang ila kalautan. ²⁷ Ginahimo niya ini tungod kay nag-untat sila sa pagsunod sa iya, kag wala nila ginasapak ang iya mga pamaagi. ²⁸ Ginapigos nila ang mga imol, kag nabatian sang Dios ang ila sini pagpangayo sang bulig. ²⁹ Pero bisan maghipos kag magpanago ang Dios, wala sing may makasiling nga indi husto ang ginahimo niya. Pero ang matuod, nagabantay ang Dios sa mga tawo kag sa mga nasyon, ³⁰ agod matapna niya ang pagdumala sang indi diosnon nga mga tawo nga makahalit sa katawhan.

³¹ “Job, ngaa indi ka magpalapit sa Dios kag magsiling, ‘Nakasala ako, pero indi na ako magpakasala pa’ ³² ukon ‘Ipahayag sa akon ang akon sala. Kon nakasala ako, indi ko na ini paghimuon liwat.’ ³³ Paano sabton sang Dios ang imo ginapangabay kon indi ka maghinulsol? Ara sa imo ang desisyon, indi sa akon. Gani sugiri ako kon ano ang masiling mo. ³⁴ Ang mga tawo nga maalamon kag may pag-intiendi, nga nagapamati sa akon, ³⁵ makasiling man nga ang imo ginahambal, Job, wala sing kaalam kag wala sing pulos. ³⁶ Dapat tilawan ka gid man sing tudo tungod nga nagahambal ka pareho sa malaot nga tawo. ³⁷ Gindugangan mo pa ang imo sala paagi sa pagrebelde sa Dios. Ginatamay kag ginainsulto mo ang Dios sa amon atubangan.”