¹Anak, tipigi sa imo tagipusuon ang akon mga ginatudlo kag ginasugo sa imo. ² Tumana ang mga ginasugo ko sa imo, agod magalawig ang imo kabuhi. Tipigi sing maayo ang mga ginatudlo ko sa imo pareho sang pagtipig mo sang imo mata. ³ Itanom ini sa imo hunahuna agod indi mo gid malimtan. ⁴ Kabiga ang kaalam subong imo utod nga babayi kag ang pag-intiendi subong imo suod nga abyan. ⁵ Kay makapahilayo ini sa imo sa malain nga babayi nga makagalanyat kon maghambal.

Ang Malain nga Babayi

⁶ Isa ka adlaw, nagpamintana ako sa balay, ⁷ kag nakita ko ang mga pamatan-on nga mga lalaki nga wala sing may nahibaluan sa kabuhi. Ang isa sa ila wala sing pag-intiendi. ⁸ Nagalakat siya sa dalan pakadto sa kanto nga sa diin ara ang balay sang isa ka malain nga babayi. ⁹ Sirom na sadto kag nagadulom na. ¹⁰ Dayon ginsugata siya sang babayi nga ang iya bayo pareho sa bayo sang babayi nga nagabaligya sang iya lawas. Nakaplano na siya nga daan kon ano ang iya himuon sa sadto nga lalaki. ¹¹ Ini nga babayi palawakal kag wala sing huya. Wala siya nagapahimuyong sa iya balay. ¹² Nagaistambay siya sa higad sang mga dalan ukon sa mga kanto, kag kon kaisa sa mga plasa. ¹³ Pagkakita niya sa lalaki, ginhakos niya siya kag ginhalukan. Kag nagsiling siya nga wala sing huya-huya, ¹⁴ “Gintuman ko subong ang akon promisa nga maghalad, kag may mga karne didto sa balay halin sa sapat nga ginhalad ko. ¹⁵ Gani ginpangita ko ikaw, kag maayo kay nakita ko ikaw. ¹⁶ Nahapinan ko na ang akon hiligdaan sang dekolor nga tela nga halin pa sa Egipto. ¹⁷ Ginbutangan ko ini sang mga pahamot nga mira, aloe, kag sinamon. ¹⁸ Gani dali, maghulid kita; magpaayaw-ayaw kita sa kalipay hasta mag-aga, ¹⁹ kay wala diri ang akon bana. Naglakat siya sa malayo. ²⁰ Madamo nga kuwarta ang iya gindala kag mga duha pa ka semana antes siya magabalik.”

²¹ Gani nadala niya ang lalaki paagi sa iya matam-is kag makagalanyat nga mga pulong. ²² Sa gilayon nagsunod ang lalaki sa iya pareho sa baka nga ginaguyod sa ilihawan ukon pareho sa usa^[a] nga nagapadulong sa siod ²³ nga sa diin patyon siya sa pana. Pareho man siya sa isa ka pispis nga nagadali-dali pakadto sa siod nga wala kahibalo nga kamatayon gali ang iya padulungan.

²⁴ Gani, mga anak, pamatii ninyo sing maayo ang akon mga ginasiling. ²⁵ Indi kamo magpadala-dala sa sini nga klase sang babayi; indi kamo magpatalang sa iya. ²⁶ Madamo na nga mga lalaki ang nalaglag tungod sa iya. ²⁷ Kon magkadto kamo sa iya balay, pareho lang nga nagapadulong kamo sa lugar sang mga patay.